Құлмағанбетов Теміржан

       1919 жылы қазір Қостанай облысы, Аманкелді ауданына қарасты №2 ауылда дүниеге келген. Әке-шешесінен жастай айырылып, жақын ағайындарының қолында тәрбиеленіп, аудан орталығындағы мектепте білім алған. 1940 жылдың қаңтар айында Қызыл Армия қатарына шақырылады. І Белоруссия майданы құрамындағы 65 Армияның 190 гвардиялық полкінде жау әскермен кескілескен ұрыстарға қатынасады. Белоруссияның Погоран селосын босату ұрысында «Ерлігі үшін» медальмен марапатталған. Кейін Осовец-Книшин қаласын жаудан босатқаны үшін І дәрежелі Отан соғысы орденіне ие болды. 1943 жылдың ақпан айында немістерге қарсы шабуылда он қолын снаряд жұлып кетіпті. Госпитальда жатып, ұзақ емделіп, 1943 жылдың тамыз айында елге оралды. Ел арасында еңбектен қалмай мал бағады, көптің құрметіне бөленеді. Соғыстан кейін мерекелік медальдармен марапатталады. Артында 2 ұл, 5 қызы, немере-шөберелері бар. Зейнеткерлікке шыққанан кейін 1996 жылы 9 наурызда қайтыс болды.

Амангельдинский район

Құлмағанбетов Тойшығара

       1924 жылы Аманкелді ауданы, Құмкешу ауылында туған. 1942 жылдың шілде айында Торғай АӘК-нан әскер қатарына шақырылып, 109 АД, 404 АП құрамында қатардағы жауынгер болған. 1945 жылы әскер қатарынан босаған. 1991 жылы қайтыс болған.

Амангельдинский район

Құлмурзин Ыбрай

       1912 жылы қазіргі Аманкелді ауданына қарасты Үрпек ауылында туған. 04.1942 жылы Торғай АӘК-нан әскерге шақырылып, соғыста 204 АП құрамында қатардағы жауынгер болған. Әскер қатарынан 05.1945 жылы босап елге келген. Жаңаауыл колхозында, «Родник», А.Иманов атындағы совхоздарда машина жүргізуші, кейін шопан болған. Жауынгерлік еңбегі үшін 5 медальмен марапатталған. Зейнеткерлікке шығып, қайтыс болған. Жанұясында ұл, қыздары мен немерелері бар.

Амангельдинский район

Құлсеитов Садық

       1917 жылы қазіргі Қостанай облысы, Жангелдин ауданындағы Қызбел ауылында дүниеге келген. Балалар үйiнде өскен. 10 ақпан 1939 жылы Семиозер аудандық әскери комиссариатынан әскер қатарына шақырылып, 732 атқыштар полкiне жiберiлдi. Фин соғысына қатысты. Ұлы Отан соғысына бiрiншi күндерiнен бастап қатысқан. 1942 жылы ауыр жарақатталып, соғысқа жарамсыз деп елге жiберiлген. Елге оралған соң Мырзакөлде завхоз, кейін басқарма болып жұмыс iстеген. Осы жылдары отау құрып, өмiрге 7 бала келген. 1945-1992 жылдар аралығында аға шопан болып, елiне адал еңбек еткен. Осы елге жасаған адал қызметi еш кеткен жоқ. Халықтың, елдiң алғысына бөлендi. Оның нәтижесi – алған марапаттаулар мен мадақтаулары. Атамыздың кеудесiнде «Халықтар достығы» орденi, Еңбек Қызыл Ту орденi және Жеңістің мерейлiк медальдары жарқырады.

Наурзумский район

Құлтаев Қайырбек

       1908 жылы қазіргі Аманкелді ауданында туған. Торғай АӘК-нан 1942 жылы ақпан айында әскерге алынып, Шұбаркөл қаласындағы әскери дайындықтан өткеннен кейін, 312 АД, 1083 АП құрамында қатардағы жауынгер болып, орталық Украина майданында соғысқан. Жауынгерлік ерлігі үшін І дәрежелі Даңқ орденімен, «Ерлігі үшін», «Варшаваны азат еткені үшін» және жеңістен кейінгі мерекелік медальдармен марапатталған. Әскер қатарынан 1945 жылы мамырда босап, елге келгеннен кейін аудан шаруашылықтарында жұмыс істеген. 1987 жылы қайтыс болған.

Амангельдинский район

Құлыбеков Самұрат

       1920 жылы Аманкелді ауданында туған. Әскерге Торғай АӘК-нан шақырылып, соғыста 253 АП құрамында қатардағы жауынгер болған. Жауынгерлік бес медальмен марапатталған. Әскер қатарынан 1945 жылдың мамыр айында елге оралып, колхоз, совхоздарда жұмыс істеп, қайтыс болған.

Амангельдинский район

Құлымбетов Қостемір

       1916 жылы 9 мамырда қазіргі Қостанай облысы, Аманкелді ауданына қарасты 2-ші ауылда дүниеге келген. Байғабыл бастауыш мектебін бітірген. 1939 жылы әскер қатарына шақырылып, №39 гвардиялық атқыштар дивизиясының құрамындағы 41-ші жеке барлау ротасында бөлімше командирі болған. Финн соғысына қатынасады. Ұлы Отан соғысының алғашқы күнінен бастап мұздай қаруланған фашист әскерінің жантүршігерлік шабуылын тойтарысқа ат салысады. Соғыста сержант, аға сержант, старшина, лейтенант шеніне дейін жоғарлайды. 1943 жылдың қаңтар айында жау шебін барлауда жүргенде жараланып, медсанбатқа түседі. Майдандағы ерліктері үшін Қызыл Жұлдыз және ІІ дәрежелі Отан соғысы ордендерімен, «Жауынгерлік еңбегі үшін» медалімен марапатталған. Сонымен қатар соғыстан кейінгі мерекелік 8 медалі бар. Елге келген соң Жасбуын, Байғабыл, Крупская атындағы мектептерде көп жыл ұстаз болып бала оқытады. Зейнеткерлікке шыққанан кейінде қарап отырмай совхоз шаруашылығына қолқабыс тигізеді. Артында 3 ұл және қыздары мен немерелері, шөберелері бар. 1984 жылы қайтыс болды.

Амангельдинский район

Құндызбаев Мырзағали

       1905 жылы бұрынғы Қараторғай болысында туған. Әскерге 1942 жылы Торғай АӘК-нан шақырылып, Шұбаркөл қаласында әскери дайындықтан өткеннен кейін 453 АП құрамында ІІ Украина майданында соғысып, Венгрия, Румыния жерлерін жау әскерінен азат ету ұрыстарына қатынасқан. «Жауынгерлік еңбегі үшін», «Будапешті алғаны үшін», «1941-1945 жылдардағы Ұлы Отан соғысында Германияны жеңгені үшін», сонымен қатар жеңістің мерекелік үш медальдарымен марапатталған. Әскерден 1945 жылы босап елге келгеннен соң, колхоз, совхоздарда жұмыс істеген. 1987 жылы қайтыс болған.

Амангельдинский район

Құрманов Жұмат

       1902 жылы 5 қаңтарда Қостанай облысы, Аманкелді ауданында туған. Бастауыш мектебін бітірген, арабша сауаты болған. 1942 жылы соғысқа аттанып, 1946 жылы аман елге оралған. Соғыста байланысшы міндетін атқарған. І дәрежелі Отан соғысы орденімен, «1941-1945 жылдардағы Ұлы Отан соғысында Германияны жеңген үшін» және мерекелік медальдармен марапатталған. Соғыстан кейінгі жылдарда Аманкелді ауданы Жамбыл колхозында бухгалтер болды, зейнетке шыққасын Науырзым ауданы Қайғы ауылында әр-түрлі жұмыс істеген.Төрт бала, сегіз немере, алты шөбере өсірген. 1984 жылы 22 маусымда Қайғы ауылында қайтыс болды.

Наурзумский район

Құрманов Жұмаш

       1917 жылы дүниеге келді. Ол өзінің еңбек жолын 1938 жылы ұстаздық етуден бастап, ұзақ жылдар жас ұрапаққа білім беру саласында жемісті еңбек етті. 1942 жылы 25 ақпанда Торғай аудандық әскери комиссариаттан соғысқа аттандырылған. 118 гвардейск атқыштар полкінде атқыш қызметін атқарған. 1943 жылы ауыр жаралы болғандықтан елге оралған. І дәрежелі Отан соғысы орденімен, «1941-1945 жылдардағы Ұлы Отан соғысында Германияны жеңгені үшін» және мерекелік медальдармен марапатталған. Соғыстан кейін Аманкелді аудандық комсомол комитетінің хатшысы қызметін, одан соң 1952 жылдан партия, Совет жұмыстарын атқарып, үлкен ұйымдастырушылық қабілеттін танытқан. Қайғы МТС-і бастауыш партия ұйымының хатшысы, колхоз басқармасы, 1966-1977 жылдар аралығында «Костанайский комсомолец» совхозында парткабинет меңгерушісі қызметтерін атқарып, еңбекте табандылық танытты. Үш ұл, төрт қыз өсіріп, жиырма немере, екі шөбере өрбіткен бақытты әке, бақытты ата. 1990 жылы 8 мамырда Қайғы ауылында қайтыс болды.

Наурзумский район