Қамитбеков Ғалым

       Торғай өңірінің Аменгелді ауданына қарасты шалғайда жатқан Мұқыр ауылында 1922 жылдың 1 тамызында тұған. Өсе келе, ауыл мектебінің табалдырығынан аттап, сегізінші сыныпты бітірді. Осылай қалыптасып келе жатқан бейбіт өмірді қиыр батыстағы бұрқ ете қалған соғытың жалыны шарпып өтті. Жасы 19-ға енді толған ол, өзімен тетелес жастармен бірге армия қатарына алынды. Сегіз айлық әскери дайындықтан өттіп, Украина жеріндегі қиян-кескі ұрысқа қатысады. Соғыста екі жылдай болады. Курскі түбіндегі шайқаста ауыр жараланып, госпитальге түседі, есінен айырылып ұзақ жатады. Бірнеше ай емделіп, екінші топтағы мүгедектігін алып, еліне қайтады. Соғыстан кейінгі өмірі оқу-ағарту саласымен тығыз байланысты болды. Мендіқара қазақ педагогикалық училищесіне 1947 жылы түсіп, төрт жылдан кейін толық курсын бітіріп шықты. Кейін Ақтобедегі мұғалімдер институтында сырттай оқыды. Өз мамандығымен 40 жыл жұмыс істеп, зейнеткерлікке шықты. Бұл күндері Ғалым ағай мен сүйікті жары Нұржамал апай жеті бала тәрбелеп, ұлын ұяға, қызын қияға қондырған, немерелі-шөберелі болған бақытты жанұяның абзал жандары.

Костанайский район

Қамитбеков Ғалым

       1912 жылы қазіргі Аманкелді ауданының Қайғы ауылында туған. Әскерге 1942 жылы ақпанда Торғай АӘК-нан шақырылып, соғыста 520-ші АП құрамында қатардағы жауынгер болған. Жауынгерлік төрт медальмен марапатталған. Әскерден келген соң, «Степняк» совхозында жұмыс істеп, қайтыс болған.

Амангельдинский район

Қожамжаров Жұмабек

       1911 жылы қаңтарда қазіргі Қостанай облысы, Жангелдин ауданы, Албарбөгет округінде дүниеге келген. Соғысқа дейінгі жылдарда әуелі серіктестікте, кейін ұжымшарда мүше боп еңбек еткен. 1941 жылы Ұлы Отан соғысына аттанып, жаяу әскер қатарында болған. 1945 жылы соғыс аяқталғаннан кейін, елге оралып, өзі туған Албарбөгет ұжымшарында мал бағып, озат шопан болды. Ұлы Жеңістің 20, 30, 40, 45 жылдығына байланысты медальдарымен марапатталды. 1995 жылдың 19 наурызында қайтыс болды. Зайыбы Тұрғанша Шайхығалиқызы 5 ұл, 3 қыз тәрбиелеп өсірген «Ардақты ана» иегері. Еңбекқор, қазақ халқының өсуіне үлес қосқан қарапайым отбасы болатын.

Джангельдинский район

Үндемесов Жаманқұл

       1925 жылы Шилі өңірінде дүниеге келген. Білімі 7 класс. Жітіқарада механизаторлық мамандықты меңгерген. 1942 жылы армияға алынған. Челябі облысының Шұбаркөлінде сегіз ай дайындықтан өтіп, Украина майданында соғысады. Курск шайқасында сол жақ иығынан жараланған. Госпитальдан шыққан соң, 44 танк бригадасының құрамында соғысып жүргенде 1944 жылы кеудесінен ауыр жарақат алып, Москвадағы госпитальда емделген, кейін Ессентуки санаториінде сауықтандырылды. Соғысқа жарамаған соң, елге қайтарылған. Ауылда әуелі әкесімен бірге жылқы баққан. Кейін 1958 жылдан 1985 жылға, зейнетке шыққанға дейін, «Бестау», «Шилі» кеңшарларында техникалық қойманың меңгерушісі боп істеді. ІІ дәрежелі Отан соғысы ордені, бірнеше медальдары бар. Қазір өзінен тараған балалары мен немерелерінің арасында бақытты өмір сүруде. Қоғамдық өмірге белсене араласатын, тынымсыз ардагер.

Джангельдинский район

Әбілдинов Әбдіқамал

       1912 жылы қазіргі Аманкелді ауданында туған. 03.1942 жылы Торғай АӘК-нан әскерге шақырылып, соғыста 42 АП құрамында қатардағы жауынгер болып, 06.1943 жылы жараланып елге оралған. Ерлігі үшін 3 медальмен марапатталған. Елге келіп, көп жыл бойы колхоз, совхоздарда жұмыс істеп, зейнеткерлікке шығып, қайтыс болған.

Амангельдинский район

Әблақасов Жамал

       1924 жылы Торғай қаласында туған. 1942 жылдың тамыз айында әскерге алынған. 9 запастағы артиллерия полкінде, кейін 85 полкте 1944 жылға дейін жауынгер болған. Әскерден 1947 жылы келген. Аудандық промартельге есепші боп орналақан. Кейін аудандық санэпидемстанция мекемесінде істеді. Ұзақ уақыт, 1984 жылы зейнетке шыққанша, аудандық ауруханада бас дәрігердің шаруашылық жөніндегі орынбасары болды. Әскердегі ерлігі үшін «Жауынгерлік еңбегі үшін», «1941-1945 жылдардағы Ұлы Отан соғысында Германияны жеңгені үшін» және Жеңістің, Қарулы Күштердің атаулы жылдарында мерекелік белгі-медальдармен марапатталды. 1993 жылы дүниеден өтті. Екі ұлы, 4 қыздан тараған ұрпақтары Қостанайда, Торғайда өмір жасауда.

Джангельдинский район

Әжмағамбетов Байдрахман

       1926 жылы 3 наурызда Қостанай облысы, Аманкелді ауданы, Байғабыл ауылында дүниеге келген. Еңбек жолын 1941 жылы Киров атындағы колхозда колхозшы болып жұмыс істеуден бастаған. 1944 жылы 17 қарашада Совет Армиясының қатарына шақырылып, ІІ Белорусь майданынын 298 атқыштар полкінің құрамында шайқасқа қатынасты. 1944 жылдың наурыз айында Днепр бойында болған ұрыста жараланды, Николаевск қаласындағы госпитальда емделгеннен кейін майдан шебіне оралды, Минск, Витебск қалаларын азат етуге қатынасты. Соғыс аяқталғаннан кейін 1946 жылдың қарашасынан Белоруссияның Полоцк қаласындағы 64675 әскери бөлімшесінде қызмет етіп, 1950 жылы елге оралды. Еңбек жолын жалғастырып, Киров атындағы колхозда қойшы болды. 1970 жылдан бастап «Степняк» совхозында құрылысшы болып істеді. 1986 жылы зейнеткерлікке шықты. Алты баласы бар (3 ұл, 3 қыз), алты немере сүйіп отыр. Наградалары: ІІ дәрежелі Отан соғысы ордені, және 10 мерекелік медальдары бар.

Джангельдинский район

Әлімов Мұхаммед Баймұханұлы

       1909 жылы қазіргі Аманкелді ауданында туған. Торғай АӘК-нан әскерге алынып, соғыста І Украина майданында 06.1941 жылдан 05.1945 жылға дейін 3 мото-АП құрамында қатардағы байланысшы жауынгер болған. Әскери атағы кіші сержант. Ерлігі үшін 8 медальмен марапатталған. Елге келіп, қызмет істеп қайтыс болған.

Амангельдинский район

Әлмағамбетов Сұлтанғазы

       1922 жылы Торғайдың Қаратоғай аулында дүниеге келген. Әскерге 1941 жылы қазанда алынып, Воронеж бағытындағы ұрыстарда қолынан ауыр жарақат алып, 1943 жылы желтоқсанда елге келген. Әуелі «Қараторғай» ұжымшарында, кейін «Еңбек» кеңшарында үлгілі шопан болды. Қойды қыста қоздатуда тәжрибе жинақтап, басқаларға үлгі болды. Өзі дүниеден өткенімен, ұрпақтары Арқалық, Торғай аумағында қазіргі заман мүмкіндігіне қарай еңбек етуде.

Джангельдинский район

Әлмамбетов Шеген

       1922 жылы Қостанай облысы, Жанкелдин ауданы, Торғай селосында дүниеге келген. 1932-1940 жж. Торғай орта мектебінде оқиды. 1941 жылдың қазан айында әскери борышын өтеуге аттанып, Ұлы Отан соғысына қатынасып, 2 рет жараланады, Калинин-Белорусь майданында бөлімше және взвод командирі болады. 1945 жылдың май айынан КПСС мүшесі, орта білімді. Соғысқа қатынасушы ретінде «Ерлігі үшін», «Берлинді алғаны үшін», «Варшаваны азат еткені үшін», «1941-1945 жылдардағы Ұлы Отан соғысында Германияны жеңгені үшін», «Тың жерлерді игергені үшін» және мерекелік медальдармен марапатталған. 1947 жылы өзінің туған елі Торғайға оралды. Осы жылдан бастап аудан орталығында әр салада үзбестен еңбек етеді. 1961 жылдан – Жанкелдин ауданы Торғай селолық Советінің председателі болып жұмыс атқарады. 1964 жылдан – Жанкелдин совхозрабкооп председателі. 1975 жылы – Жанкелдин аудандық ПМК-1505, трест Тургайсельстрой – 15 мекемесінде кадрлар бөлімінің инспекторы болып жұмыс атқарады. Жұбайы медицина қызметкері, соғысқа қатысқан Екатерина Ивановна екеуі 4 бала тәрбиелеп өсірген, ауданымыздағы үлгілі отбасы болатын. Балаларының бәрі де жоғары білімді, қызметтеріне тиянақты. 1978 жылы тамыз айында Шәкең дүниеден өтті.

Джангельдинский район